ما بعرف ان كنت مغترب ولّا "مشترق"

ما بعرف ان كنت مغترب ولّا "مشترق" بس كل اللي بعرفو اني مشتاق كتير لسورية ... لأهلي و أصدقائي و أقربائي ...... لجيراني وجيران جيراني ..... لضيعتي وكل الضيع اللي مرقت فيها بحياتي ..... لصافيتا و لطرطوس و كمان اشتقت ل حلب اللي قضيت فيها خمس سنين حلوين .... اشتقت كتير امشي تحت الشتي وانا بطريقي ع المدرسة و معي توام روحي بسّام ..... اشتقت اقفط من صوت الرعد .... ع المدرسة و الرفقة و الأساتذة اشتقت كتير .... ع خفة دم الرائعين مراد و محمود عبد الله و يامن و إيهاب ....... خصوصاً بحصص الأستاذ المحترم عبد الله .... شو بدي عد تعد ..... بصراحة اشتقت ع كل شي
يا جماعة صحيح اني الحمد لله مبسوط هون و العيشة حلوة هون بس متل العيشة بسوريا ما فيه .... هادا قدرنا و الحمد لله

كتير حكياتك حلوين... ان شا الله بترجع بالســـلامة زهير... و تعيش كل هالقصص عن جديد..
أنا بحنّ كمـــان... بس بخاف قول أنه حلب صارت وطني... و الشغلات الحلوة ببلدتي صافيتا صارت متل أحلام بتتبدد أول ما أوصل عليها.
بس المحبة بقلبي إلها ما حتروح أبداً...

المهم أنك تضل بخير وسلامه وإن شاء الله بترجع وبتشوف كل أحبابك تمنياتي لك بالتوفيق

شكراً نوارة ..... شكراً خيي أيهم لمشاعركم تجاهي و جزيل الشكر لإدارة المنتدى و أعضاء المنتدى ..... والله هالمنتدى فكرة ثورية وإن شاء الله من حلو لأحلى دايماً ع طول
ع فكرة أنا عم بكتب هلق وعم آكل حلويات شغل الوطن " راحة الدريكيش " .... رفيقي من السويداء باعتينلو اهله شوية حلويات تفضلوا شاركونا

يييي... صحة وهنــا.. محل ما يسري يمري.. ترجع بالسلامة

على عيني أخي زهير والله مشتقلك كتير والله انت ديما بالبال وأنا عم ادعيلك من كل قلبي الله يوفقك وترجع بالسلامة

يا سبحان الله ...... من كم يوم اكتبت هالموضوع و ذكرت بسام و مراد و محمود عبد الله و يامن و إيهاب .... و الله ماخجلني ... مبارح كان مراد و محمود و يامن عند بسام و معن أغلى البشر عليي حبيب قلبي خيي محمد ... كانو عم يشربوا متي طبعاً .... شفتن و شافوني كام تو كام و سمعتن و سمعوني و أنا أصرّيت انقع متي و شاركن المتة من أبو ظبي ... كنت سهرة حلوة كتير كتير كتير
الحمد لله

والله كانت السهرة حلوة كتير

إن شاء الله بترجع بخير وسلامه وبنشرب أحلا كاسة مته مع بعض

بنتشرّف خيي أيهم
إن شا الله بالأفراح

ان شاء الله ترجع لبلادك وبهديك أغنية لمطرب العرب والجبل للفنان عادل خضور
انشاء الله بالسلامة ان شاء الله بالسلامة
ترجع من بلاد بعيد ان شاء الله بالسلامة.........

والله ع راسي يا خيي عبد العزيز أنت و الفنان عادل خضّور شكراً جزيلاً ع المشاعر الصادقة .... الله يفرّحنا فيك عن قريب ان شاء الله ( إذا بعدك أعزب )
هالغنية عزيزة عليي كتير و ع طول بسمعها وأحياناً أمي بتغنيلي ياها بس كون عم احكي معاها

انشاء الله بكرا بترجع للبسمه والضحكي
وشو في عندك نسمع ولبعضنا نحكي
ترجع لأحبابك اهلك واصحابك
والكل ابتسامي انشاء الله بالسلامه
/انشاء الله بتحقق كل امنياتك /

بالله يازهير قطع قلبي هالمقطع حياتي انتي